|
由今日開始,阿咪隻腳就咁就跛左!
約左老人家的契仔漢霖同達達晨早七點半睇升旗,六點鐘起身,沖涼洗頭,懶醒搭一蚊巴士到王府井,睇住地圖行去天安門廣場,咩叫『舐』野呀?呢D就叫做『舐』野囉!原來路途都幾遙遠,升旗呢D野,真係準時無誤架!行到紫禁城牆外,已聽到第一句國歌音樂,離遠望去,升旗呀!!!好感動!一路快速步行一路睇住支旗升,鼻頭一酸,呢鼓感動。。。中國人呀! 升旗完畢先至同漢霖、達達匯合,行到前門大街入去一間名為『大娘水餃』的店舖食早餐,一向都唔鍾意食餃子,但。。。真係幾好食喎!而且,一入到去,間舖頭正在播放Beyond的『再見理想』!正! 食食下,達達發現。。。唔見左銀包!大鑊!搵左好耐都搵唔到,肯定比人扒左去!問返店員,佢話可能係頭先有個男人扒左去,信唔信佢好呢?好彩達達之前一晚將張信用咭同提款咭拎左出黎放入背囊,銀包只有三百幾蚊人民幣、身份証、回鄉咭同學生証等,點都好,都要去報公安啦! 設計對白: 達達:『比返個身份我!』 阿咪/漢霖:『。。。。。。』 達達:『我係香港人!』 阿咪/漢霖:『邊個知呀!?』 攪左成粒鐘,打的去天壇,的士佬話唔打票收我地平D,但感覺上好似係比佢坤左咁! 入到天壇,睇睇地圖及上面的告示,嘩!1度!未試過呀!爽呀!個個都話天壇冇野睇,我覺得。。。睇你從咩角度去睇,懷住咩心情去睇,做左幾多準備工夫去睇啦!一個祭天祭神祭歷代先祖的地方,唔需要有D咩享受設施,只有基本對神明尊重的祭殿,已經足夠! 去完天壇,打的到王府井匯合老人家,又再次食餃子,一日兩餐都係餃子,不過算啦!都幾好味! 食完餃子,打的到紫禁城,係我北京之行最想去的一個地方,我要努力尋找我最心愛的光緒皇帝的腳毛!去到每一個門、宮、殿門口,都要影相,不單只影景影人,最重要係影旁邊的介紹牌,好讓我記得每個門、宫、殿的來頭及歷史。 誓要尋找珍妃井,珍妃係光緒皇帝的愛妃,因為鼓勵光緒皇帝進行維新,被老八婆命令太監崔玉貴擲左入井,從此與光緒皇帝陰陽相隔。。。一段淒怨動人的愛情故事。。。 每個門、宮、殿門口都會擺放一對銅缸,從前銅缸裡會放滿水,以供救火之用,今日,我諗。。。如果我匿埋響個銅缸度,就冇人搵到我,咁樣就可以響紫禁城過夜,呃多一日,夜媽媽可以摸入每個宮入面坐下龍座、訓下龍床,都幾過引! 下午4點半,正值關閉時間,亦開始近日落之時,行返去太和殿,回頭一望,日落前的太和殿的確另有一番不同感覺,好靚,好莊嚴,禁不住都要影返幅相! 企好影相,見到一群雀仔亦都從紫禁城飛出,心裡不其然的想:雀仔話咁易就可以飛到出去,但係。。。無論宮女、太監、大臣、皇親、太后同皇上,一旦響紫禁城入面,就唔係咁容易可以出去。。。一人之下,萬人之上,都只不過係一個有名無實、有心無力的傀儡,紫禁城圍牆外是他的國家,但這是一個他鮮有機會踏足的國家;紫禁城圍牆內是他的家,但亦是個困著他的一個大雀籠,皇上。。。就連雀仔也不如。。。不親身來到這裡,不能真切的感受到。。。『讀萬卷書不如行萬里路』,明白! 太多太多的感覺在心頭,我會好好記住! 去完紫禁城,打的到王府井小吃街,食炸蠍子,每串八蚊,味道。。。同羊肉串差不多,因為都係同一樣的味粉,口感。。。脆卜卜,冇肉食!再食土耳其烤肉包,每個五蚊,有烤肉、洋蔥、生菜同辣醬汁,好惹味呀!再見到士多啤梨冰糖胡蘆,每串五蚊!眼睛仔一亮!唔。。。好好味呀!!!士多啤梨好新鮮多汁,正呀!!!再食多一碟爆肚,三十六蚊都幾貴,又好似比人坤左一鑊咁。。。 六點夠鐘回到劇場準備第二場的演出,Phoebe,加油! 演出完後,一行人到北星橋小洞天食麻辣火鍋慶功,麻辣火鍋麻而不辣,麻到個咀仔痺哂。。。再次想搵個佬佬鍚返,可惜人在北京!最好味就係配有芝麻醬同蒜油,極品!加上『燕京啤酒』,享受! 慶完功同Phoebe、Grace、曾文通、Alice打的到後海的Jazz Bar,如無意外,應該係約埋阿威同阿bee,我同Phoebe、Grace一架的士,曾文通同Alice一架的士,一前一後之嘛,去到竟然係搵唔到對方,加上又冇對方的手提電話,而Phoebe同Grace之前一晚黎過竟然可以唔認得路,攪到。。。沿住後海條冰湖行左四份三條,其時溫度肯定已到達零下。。。行左粒幾兩粒鐘,打的回飯店。。。偏偏,間Jazz Bar就響另外的四份一條路上,而曾文通同Alice亦等左好耐唔見我地,都已打的回飯店。 返到飯店,開檢討大會,每人講出大家各自收到的message,各自的經歷,咩叫『舐』野呀?呢D就叫做『舐』野囉!原來。。。罪魁禍首都係阿威。。。 今日,就係咁。。。行跛左,明天還要繼續努力! 本身諗住再次晨早起身睇升旗,但係頂唔順,都係訓到八點半起身,約左焦老師、佘婆婆十點多去到袁大將軍墓。 懶醒搭一蚊雞108號巴士到崇文門睇住地圖行過去,原來,路途都幾遙遠,行到西花市大街、東花市大街,搵黎搵去都搵唔到東花市斜街,問極人都冇人知道東花市斜街、袁崇煥大將軍墓、五十九中學響邊度。。。又心急趕時間,怕焦老師佢地等唔到我會擔心,以最快速度繼續向前行,行左起碼有三條彌敦道咁長,就係咁。。。行傷左隻右腳,腳指公條筋好痛。。。 去到附近,再次打電話比焦老師,溝通左好耐終於見到佢老人家,帶我入去袁大將軍祠墓,條路。。。簡直唔係路。。。怪唔之得冇人識啦! 去到門口一睇,經過修葺後的袁大將軍祠靚到不得了,入到去見到佘婆婆,好開心,旁邊仲有一家香港人,呢家香港人係因為聽到『佘家守袁墓』的事亦而黎拜訪焦老師及佘婆婆,佘婆婆介紹我比佢地識,最好笑佢話我係佢個堂侄,哈哈!冇錯呀!響戲裡面,我係做佢個堂侄。。。細個。。。估唔到佘婆婆竟然會仲記得,好感動呀! 後面就係袁大將軍墓同佘義士墓園,入去參觀影左幅相,佘婆婆介紹佘義士墓,話我知呢個就係佢地先祖佘義士,佢仲講笑咁話都係我先祖添! 成個袁崇煥祠,眼睇面積約一千呎唔夠,但偏偏就係文革時比人罷得就罷,總共住左二十三戶人家,四十幾個人響度,唔親身黎過,唔親眼見過,真係唔敢相信呢個細得咁可憐的地方竟然可以住上咁多人! 而隔離的五十九中亦在拆卸當中,當初五十九中設法想隊霖袁大將軍墓罷埋黎做操場,焦老師話估唔到而家要被隊霖竟然係返五十九中,而袁大將軍再次獲得肯定。 一行人去食午飯,新彊菜,然後我到焦老師、佘婆婆的新居參觀。新居坐落於崇文區金魚池,即係天壇北門行出黎的對面咁上下,而原來金魚池當中的龍鬚溝亦係有段古,焦老師一邊行一邊好有心機的解釋我知,可惜我普通話有限,只聽得明三份一,但為表示我的誠意,勁勁地點頭!新居面積約六百多呎,洋樓新裝,設備完善,靚過我屋企多多聲! 其實今次黎北京探焦老師佘婆婆,最重要就係睇下佢地兩老生活成點,幸好兩老非常精神,雖然已退休,而袁墓亦交由政府管理,但生活亦非常繁忙。因為間唔中就會有中去訪問佢地,亦有D佢地唔識的人去拜訪佢地,而佢地亦都會好熱情的招待。焦老師佘婆婆亦非常溫馨,去到邊,焦老師都會拖住佘婆婆隻手,並肩上路。 閒談間,有點兒刻意唔提起焦平,驚會觸動到佘婆婆傷感之情,點知兩老仲要勁勁地講焦平,講自己冇左個仔,佘婆婆問我識唔識焦平,知唔知等等等等。。。梗係知啦!我地一齊出過黎玩架,點會唔記得佢丫!雖然佘婆婆外表好精神,但其實我覺得。。。佢腦裡子開始有D糊塗,冇辦法啦! 今次探兩老,收到一個不枉此行的消息,就係東莞的袁崇煥紀念公園已經開放,即係話我可以上去探焦平,我會去,我一定會去! 爭取時間,要到頤和園繼續尋找光緒皇帝的腳毛,焦老師佘婆婆送我打的,打的到前門,坐726號三蚊雞巴士到頤和園,路程要成個半鐘,學師太話齋,真係坐到發瘟! 去到頤和園,已經係下午三點二十五分,一入去唔理三七二十一,即搵玉瀾堂,玉瀾堂乃係當年光緒皇帝接見袁世凱的地方,被呢條二五仔出賣,戊戌政變後,光緒皇帝被老八婆軟禁於此,望入去光緒皇帝的睡房,只有一張睡床,一張等等非常簡陋的物品,呢D就係一國之君的生活,心酸!唔係話一國之君要點樣榮華富貴,佢享受都係勞動人民的錢,而我相信佢亦都唔會話係揮霍無度的人,最心酸係。。。佢係被逼住響呢度。。。 其實真係好想去埋瀛台,可惜今次資料搜集唔夠,時間又唔夠。。。將來有機會,一定要去!睇D歷史書話,當年光緒皇帝被老八婆軟禁於瀛台,房間只得一張草蓆,冰天雪地就連綿被都冇一張,而老八婆仲要命人將玻璃碎渾入凍粥度比佢食。。。心酸! 時間唔夠,只可在玉瀾堂逗留一陣,四點二十分就要走,雖然車程加埋成三粒鐘黎到頤和園只係去得玉瀾堂,但對於我黎講已經足夠!亦都唔係咁想去睇其他地方,一大批保衛國家的軍費就被老八婆用左黎砌隻唔等駛的石船,等佢可以響受扮觀音。。。 搭巴士返到前門,莫講話北兵馬司劇場,就連交道口南大街都冇一個的士佬識得去。。。講漏左,焦老師識得去,佢話因為佢以前響果度讀書喎!終於叫到架機動三輪車識得去,架車好似電單車咁,但係三輪,後面有個箱,我就座響個箱度,個司機誓神劈願話識得去,係,去到條街停低問路人,咪咪招牌對白又要再次出動~~~ 咪咪:『ne 姨支xie錢走,和交鬚 ne齋na le耍車!』 晚上演出第三場,Phoebe,加油! 今場Phoebe做得OK架!但係佢自己就好唔開心,話自己做得唔好,take it easy!而且,演後坐談會時,有人勁讚佢添! 演出完,同Phoebe、Grace、阿威同阿bee去食新彊宵夜,『燕京啤酒』,兩蚊支抵飲到爛呀!而且,唔駛雪落雪櫃,放響鋪頭門口仲凍過雪櫃呀! 宵夜完畢,再次到後海搵間Jazz Bar飲野,同香港差唔多價錢,都幾貴! 返到飯店,因為Alice今日返香港,所以我就要搬到自己一個人住一間房,搬去304,原來間房有野架!!!阿bee話鄧殊榮訓過架!!!不過,唔想自己一個人一間房都得,同師太一間房啦!唔好咁對我啦!我未想死住呀發瘟! |
浏览:734 |
| ||
| ||
新增文选 | |||||||||||
| |||||||||||
| |||||||||||
|